推荐预测：比利时轮换细撼威尔斯

卢卡古归队未必用得着

世界盃外围赛E组好戏码，比利时主场迎战威尔斯，「欧洲红魔鬼」比利时虽然整体实力胜一筹，不过球队未来1周需要应付3场世盃外，预料今仗会就住踢，以免球员消耗太多体力。至于威尔斯靠加里夫巴利单天保至尊，锋线威胁力有限，宁博中位数2.5球入球细。

大圣爷前线单打独斗

比利时领队马天尼斯今次公布名单多达33人，主要係因为嚟紧需要应付3场世盃外；除咗今场对威尔斯之外，「欧洲红魔鬼」仲要作客捷克，以及主场对白俄罗斯，赛程非常紧密。虽然效力意大利劲旅国际米兰嘅卢卡古可以归队，不过连佢在内嘅一众国脚，已经喺球会赛事经过连场激战，去到国家队仲要「1周3战」，真係铁人都顶唔顺，预料马天尼斯亦可能会轮换阵容，唔会每场都派出最佳人脚，不宜高估。

威尔斯方面，中场艾朗蓝斯因伤已经退队，虽然另一王牌「大圣爷」加里夫巴利近期喺热刺有不俗表现，问题係其他队友能力有限，所以威尔斯往往採取稳守突击踢法，锋线上靠巴利自己搵食，因此入球同失球数字都偏低，近13场就有11场总入球开出2球或以下。值得一提，威尔斯近年对住比利时成绩唔错，双方近5次交锋，威尔斯取得2胜2和1负，其中4次总入球係2球或以下，今场最好拣入球细。