专家拆局：诺域治遇强即屈难抗热刺

今晚英超热刺作客「金丝雀」诺域治，诺域治做惯英超升降机，于限米煮限饭下经常遇强即屈，何况近4次联赛碰头热刺赢咗3次，为争入前4唔会留手，客胜有计。

诺域治整体实力与英超列强差几条街，攻不锐、守不稳，就算主场出击唔见得有利，除咗季初爆大冷赢过曼城之外，其后6场主场赛事，只得1和5负。查实「金丝雀」今季9场主场全部都有失波，除咗首战纽卡素失1球外，其馀8场每场至少失2粒，累积失咗22粒，主场失球数字係今季英超第2高球队，犹如不设防，加上上仗护级大战输畀阿士东维拉，跌落包尾，打击士气。

哈利卡尼金丝雀剋星

热刺踢法坚进取，上仗反胜白礼顿2比1，坚有主帅摩连奴点都唔认输嘅影子，面对诺域治呢类以守代攻嘅球队，更加容易控制大局。双方近4次交手热刺赢3次，虽然孙兴民要继续坐波监，但睇番嗰3场胜仗，有2场「老孙」都缺阵，另1场亦未有踢足全场，所以对今场影响不大，而且队长哈利卡尼最近2次对赛都梅开二度，证明佢对「金丝雀」特别有计。依家热刺只落后「4哥」车仔3分，为争前4必定开行Trobo，遇弱更不容有失，客胜有买趁早。